Duration: 5:17
Ka kōrero ko Merita e pā ana te hangarau me te tūāpapa i roto i ō rātou kura. I te tīmatanga i rangahaua a Merita i te āhuatanga o te hangarau tūāpapa e tika ana mō tō rātou kura. E haere ana ia ki ngā hui maha me te whakaaro tonu kia tika ngā taputapu mō tō rātou kura, ehara mō te hoko noa.
Merita Waitoa-Paki: Tumuaki TKKM o Tuia Te Matangi
Tēna koutou te iwi, ko Merita Waitoa-Paki taku ingoa, ko Hikurangi, ko Puketapu ngā maunga. Ko Te Arai, ko Waiapu ngā awa. Ko Ngāti Porou, ko Rongowhakaata ngā iwi. Ko au te tumuaki o te Kura Kaupapa Māori o Tuia te Matangi. Ki te rohe o te tauihu o te waka a Maui, ki roto o Whakatū. He kura kaupapa tino hou mātou. Kotahi tau noa iho mātou e tū ana ki tēnei o ngā momo wāhi, ā, tēna koutou katoa.
Ko te hangarau tūāpapa. Nā reira, he nui ngā hui, maha tonu ngā hui. I hui ki te hapori, i hui ki tō mātou, ki ngā iwi e waru o te takiwā nei, ā, me ngā hui i tū ki ia kāinga, ki ia kāinga. Hei aha? Hei kohikohi i ngā whakaaro, kohikohi i ngā hiahia o te whānau me ngā tamariki. Ana, mai i ngā kōrero i kohikohi haere i puta mai, kia tawhiti te hono ki te ipurangi, mai i tēra puke, whīra o te kura, tae atu ki tēra atu taha o te kura. Ka taea te tamaiti, te akonga, te pouako te hono ki te ipurangi mehemea koirā te hiahia. Te tuku mera-hiko, whakaahua rānei, mai tēra kokonga o te kura, ki tētahi atu kokonga o te kura, mehemea ki waho, ki roto, ki ngā wāhi katoa.
Nō te mea kei Whakatū mātou, me tō mātou waimarie, he hapori koi mō ngā mahi hangarau, arā, ko te Nelson Loop tēra. Nā reira, i tēra tau, i mua i te whakatūwhera mai i tō tātou nei kura, i whai wā ahau ki te hui ki ngā rangatira, ngā mātanga o taua kaupapa. Ana, ko Charles, ko Matua Charles Newton tētahi, me ana kōrero ārahi i ahau, he aha? Me āta haere, me tika te whakarite i te marau ā-kura, o ngā akoranga i te tuatahi. Nā reira, mai i tēra, i haere ahau ki te rangahau. I haere au ki ētahi atu kura ki Tamaki Makaurau, kite i ētahi o ngā āhuatanga pai mō te hangarau tūāpapa, he aha ngā momo rauemi tautoko mō ngā pouako i reira, kōrero hoki au ki ngā tumuaki. Nā reira, mai i ēra momo haerenga i whakarite mātou o Tuia te Matangi i tō mātou hangarau tūāpapa.
Nā reira, i ēnei rangi, he tere, he māmā, nā te aha? Nā te tika o tō mātou hangarau tūāpapa, hei whakaniko i ngā mahi o ngā reanga katoa. Mehemea he ī-papa, he rorohiko kawe mai anō, ka hoki atu ki te kaupapa o te kura, ngā akoranga, he aha ngā akoranga? Me whai hua ngā akoranga. Kāore au i te tautoko kia haere ki te hoko i ngā taputapu mō te hoko noa iho. Me whai pānga, kia tika te hoko. Mai i tēra, i whakaae mātou, i whakarite i ngā māhere, ko te hoko i ngā ī-papa tekau mā waru nei mō te kura, tīmata mai i reira, ā, me ngā iMacs e whā.
Nā reira, he huarahi roa, ā tōna wā hoki ka hoki ētahi anō.