Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Te Rangitukutuku

"Ko tō ringa ki ngā rākau o te Pākehā"

Ngā mihi o te wā ki a koe, otiia, ki a tātou katoa. Kei tēnei whārangi ētahi pitopito kōrero hei āwhina i tō māramatanga, mōhiotanga mō Māori Medium e-Learning Planning Framework (MMeLPF) e kiia nei ko Te Rangitukutuku. Ki te pīrangi āwhina anō, tēnā, tuku karere mai ki [email protected] .

He whakamāramatanga  | MMeLPF/Te Rangitukutuku: tōna ingoa  | MMeLPF/Te Rangitukutuku: tōna ngako  | MMeLPF/Te Rangitukutuku: tōna hanga  | MMeLPF/Te Rangitukutuku: te anga  | He rauemi āwhina

He whakamāramatanga

Kei te reo Māori me te reo Pākehā ngā kiriata nei. Ka whakamārama mai a Daphne Papuni ki te reo Māori, i ngā āhuatanga o te kaupapa nei o Te Rangitukutuku. Ka pēnā anō te āhua o te kōrero a Kathe Tawhiwhirangi ki te reo Māori. Ehara i te mea kua whakamāorihia, kua whakapākehahia rānei ngā kōrero. He rite te ia o ngā whakaaro a ngā kaikōrero e rua nei. Tirohia ngā mea e rua nei, mā reira e puta ai te whakamāramatanga o Te Rangitukutuku.

E kōrero ana a Daphne Papuni e pā ana te Māori Medium e-Learning Planning Framework/Te Rangitukutuku, mō te hunga Māori e mahi ana i roto i te ao mātauranga Māori.

In this video Kathe Tawhiwhirangi gives an explanation of the Māori Medium e-Learning Planning Framework, the name Te Rangitukutuku and its five dimensions being: Taiao ako, Kanohi mataara, Te ako, Whanake ngaiotanga, and Te hangarau, te tūāpapa.  

Māori Medium e-Learning Planning Framework/Te Rangitukutuku: tōna ingoa

Ka puta mai te ingoa o Te Rangitukutuku i runga i te tono a te Ohu Matua me te Ohu Whāiti. Arā, i mea mai rātou, kia Māori tonu te āhua o tēnei anga, ā, kia tiki atu i tētahi ingoa Māori hei whakamārama i ngā āhuatanga o roto i te anga nei.

Nā Justin Roberts, nō te kamupene o CORE Education Ltd, te ingoa i homai. I puta mai te ingoa i runga i tōna māramatanga ki ngā āhuatanga o te Māori Medium e-Learning Planning Framework hei anga arotake, hei anga ārahi hoki i tētahi huarahi kōkiri whakamua.   

E rua ngā whakaaro nui i roto i Te Rangitukutuku, arā, ko "tukutuku" me "rangi". Ko ngā tukutuku, kei ngā pakitara o ngā wharenui, ngā whare whakairo puta noa i te motu. Ko ngā tukutuku nei, he kaipupuri kōrero, e pupuri ana i ngā kōrero o te iwi, o te whānau, o te hapū. He mea e whakārama ana i ngā kōrero o tēnā whare, o tēnā whare, o tēnā iwi, o tēnā iwi. Ko te mea hoki, ko ētahi o ngā tauira tukutuku i ahu mai i te rangi. Arā, ko Purapurawhetū tēnā, ko te Mangōroa tēnā, ko Poutama anō tēnā. I ngā rā o mua, ā moroki noa nei, nā te kāhui whetū ā tātou tīpuna i ārahi i runga moana, i runga whenua anō hoki. Ka pēnā anō mō te Māori e-Learning Planning Framework. Arā, mā te rangi e tuku nei i ngā tohu kia tika te haere, ā, mā te anga nei a MMeLPF e tuku nei i ngā tohu kia tika te haere, kia tika te ako rānei.

Māori Medium e-Learning Planning Framework/Te Rangitukutuku: tōna ngako

He anga te Māori medium e-Learning Planning Framework/Te Rangitukutuku e tautoko ai i ngā kura me ngā kaiako kia tirohia ō rātou mārama, ō rātou mātau ki ngā mahi ako-e. Ka tautoko hoki i ngā mahi arotake me ngā mahi whakapiki pūkenga, ngā mahi whakapiki mōhio ki ngā mahi ako-e.

Mā te Māori Medium e-Learning Planning Framework/Te Rangitukutuku e whakatakoto i:

  • tētahi mahere e mōhio ai te kura, te kaiako, kei hea rātou, he aha ngā mahi e whakapiki ai ā rātou mahi whakaako me te tūhono ki ngā kōrero me ngā tauawhi
  • te anga nei i ētahi tukanga, ētahi mahi whakaako e hiki ai te mārama o te kura ki ngā mahi ako-e
  • ētahi tauira me ētahi rauemi e whakamārama ai me pēhea te whakamahi i rō akomanga 
  • tētahi aratohu e whakamārama ai me pēhea te whakamahi mō te mahi arotake. 

View full size Te Rangitukutuku diagram

Māori Medium e-Learning Planning Framework/Te Rangitukutuku: tōna hanga

Ngā nekenekehanga

Mā te kōrero ka mōhio, mā te mōhio ka mārama, mā te mārama ka mātau. Ka noho ēnei kupu kōrero hei tūāpapa mō ngā āhuatanga o ngā nekenekehanga i roto i Te Rangitukutuku.

View full size Ngā Nekenekehanga diagram

  • Wahangū: E ngū ana a waha, kāore te kaupapa e kōrerohia ana. 
  • Kōrero: E kōrerohia ana te kaupapa. Kua tīmata ngā wānanga, ngā whakawhitinga kōrero.
  • Mōhio: Kei te mōhio te kaupapa. Kei te mahia ētahi mahi. Kei te rangahau tonu ētahi āhuatanga kia tino mārama ai.
  • Mārama: Kei te mārama pai te kaupapa. Kei te pai te rere o te kōrero me ngā mahi. Kei te wherawhera tonu ētahi wāhanga kia mātau ai te tangata.
  • Mātau: Kātahi te hunga matatau ko tēnei!. Anō nei, kua eke te kounga o te kaupapa, mahi rānei.

Ngā Whenu

E rima ngā whenu o Te Rangitukutuku, he rite ngā āhuatanga o ngā whenu nei ki te eLPF, heoi, kua whai wāhi ai te whānau, hapū, iwi, hapori me ngā ākonga ki ngā whenu katoa.  Ko ngā ingoa o ngā whenu i roto i Te Rangitukutuku e pēnei ana:

  • Te Taiao Ako
  • Te Kanohi Mataara
  • Te Ako
  • Whanake Ngaiotanga
  • Te Hangarau, Te Tūāpapa

Mō ngā whakamāramatanga mō te hono o ēnei whenu, tikina ake ki raro nei.

Ngā Whenu e Rima.pdf (PDF, 119.10 kB)

Ngā whakataukī

E rima ngā whenu i roto i Te Rangitukutuku. Ka noho ngā whakataukī, ngā kīanga rānei hei kupu tautoko i te ia, i te wairua hoki o ia whenu.  

  • Te Taiao Ako – He tangata ākona ki te marae tau ana
  • Te Kanohi Mataara – Māku e whatu, mā koutou e tāniko
  • Te Ako – Ko te mokopuna/ākonga te pūtake o te mātauranga
  • Whanake Ngaiotanga – He toi whakairo, he mana tangata
  • Te Hangarau, Te Tūāpapa – Ko tō ringa ki ngā rākau a te Pākehā

Mō ngā whakamāramatanga mō te hono o ēnei whakataukī nei ki ngā āhuatanga o te ako-e, tikina ake ki raro nei.

Māori Medium e-Learning Planning Framework/Te Rangitukutuku: te anga

E wātea ana te eLPF hei utauta ā-tuihono, ā-tuimotu rānei. Māu e whakatau ko tēwhea te utauta e tika ana mō tō kura.

Tērā pea, ka kōwhiritia te utauta ā-tuihono i te mea:

  • he tōtika te āhua o te kohikohi pārongo i ngā kaimahi katoa i te wā poto - kei tōna 40 mineti te roa o te uiui
  • ka kohi mōhiohio i ia tangata
  • he āhua hāngore te wāteatanga (te wā me te wāhi) - me te whai wāhi hoki o rātou kāore e te tae ā-tinana atu ki te hui kaiako, pērā i ngā kaimahi tautoko.

Tērā pea, ka kōwhiritia te utauta ā-tuimotu i te mea;

  • kāore i te tino pūmau hononga ipurangi/pūtirotiro a te kura e pai ai te whakamahinga o te utauta ā-tuihono
  • he pai hei ngohe whakawhanake i te taea o te tangata ki te whakamahi utauta ā-tuihono

I whakahouhia ngā anga e rua nei, arā, Te Rangitukutuku me te e-Learning Planning Framework i Kohitātea, 2014. E pēnei ana te āhua o ngā whakahoutanga mō Te Rangitukutuku:

Kua hangaia he kupu taka. E whakarārangi ana i ngā kupu hou, i ngā kīanga rānei e whakamahia ana, e hāngai ana rānei ki te kaupapa o Te Rangitukutuku, me te kaupapa o te ako-e, te hangarau mōhiohio, te ao matihiko. Tīkina ake ki raro nei.

He rauemi āwhina

He rauemi ēnei e tautoko ana i ngā whakaaro nui i roto ngā whenu o Te Rangitukutuku.

Tirohia ēnei paetukutuku me ngā whakaaro mō te mahi tahi me te whānau.

He rauemi kiriata, he tuhinga kōrero ēnei kei te paetukutuku o Te Marautanga o Aotearoa.

He hononga ki ētahi rauemi kei paetukutuku kē, e hāngai ana ki ngā āhuatanga o te taha whakahaere.

E whai wāhi atu ana ngā āhuatanga katoa o te ako i tēnei whenu, mai i te āhua o te ākonga, me te hanga marau ā-kura, ā, tae noa atu ki te taha whakaako, aromatawai hoki.

He hononga ēnei ki ētahi rauemi e tautoko ai i te whakangūngūtanga, i te whanaketanga o ngā kaiako, o te whānau i roto i ngā āhuatanga o te ako-e.

Koinei te wāhanga e hāngai ana ki ngā taputapu, ki ngā rawa hangarau.


Footer: