MMeLPF/Te Rangitukutuku (reo Māori)

Daphne Papuni
Tuhoe, Te Whakatōhea
Facilitator: MMeLPF/Te Rangitukutuku

Ko te Māori Medium e-Learning Planning Framework, he mea waihanga i runga i ngā whakaaro tuatahi, o te ao Māori, tuarua, i puta anō i runga i te whakaaro o te hunga Māori e mahi ana i roto i te ao mātauranga Māori.

Ko te ingoa Māori mō tēnei kaupapa, me kī, ko Te Rangitukutuku. E rua ngā whakaaro nui o Te Rangitukutuku, arā ko te rangi me te tukutuku.

Me titiro tātou ki ō tātou wharenui, whare whakairo puta noa i te motu. Ko ngā tukutuku kei ngā pakitara o ēnei momo whare.  Ko ngā tukutuku he kaipupuri kōrero o tēnā hapū, o tēnā hapū. Nō reira, ka pēnā anō mō Te Rangitukutuku.  Ko ngā tauira he mea tiki mai i te rangi, arā, ko te purapura whetū tēnā, ko mangōpare tēnā, ko poutama anō hoki tēnā.  Nā te kāhui whetū i tohutohu me kī, i a tātou tīpuna i runga moana, i runga whenua anō hoki.  Me hoki atu tātou ki tēnei anga a Te Rangitukutuku. Ka pēnā anō a Te Rangitukutuku, ka tuku anō i ngā tohu kia tika te haere o ngā mahi.

He anga a Te Rangitukutuku, he mea arotake i te mātau o te kura i roto i ngā mahi hangarau mōhiohio me te ako-e. Mā tēnei anga a Te Rangitukutuku nei rātou e āwhina ki te kimi huarahi kia pakari anō ai tēnei taha o rātou.

Mā wai te kaupapa nei? Me kī, mā ngā kura Māori, mā ngā whare rumaki Māori hoki puta noa i te motu.

E rima ngā whenu o Te Rangitukutuku. Ko te mea tuatahi ko Te Taiao Ako. Koinā te whenu e hāngai ana ki ngā āhuatanga o te noho tahi a te kura me te whānau, te hapū me te hapori hoki. Ko te mea tuarua ko Te Kanohi Mataara. Koinei te āhuatanga o te whakahaere i ngā mahi a ngā hunga whakahaere.  Ko te tuatoru o ngā whenu ko Te Ako, arā, ko ngā mahi katoa o te ako. Ko Te Whanake Ngaiotanga, koinei ngā mahi whakangūngū i roto i te kura. Ko te mea whakamutunga ko Te Hangarau, Te Tūāpapa. Koinei ngā āhuatanga katoa, ngā rawa, ngā taputapu katoa o te hangarau me ngā āhuatanga o te tuhonohono o te kura ki te ipurangi, me ērā āhuatanga katoa.