Duration: 3:27
E kōrero ana a Merita Waitoa-Paki, te tumuaki o TKKM oTuia Te Matangi i Whakatū e pā ana ngā piki me ngā heke o Te Kanohi Mataara. Ki tāna, i te tīmatanga ko tētahi o ngā māharahara kia kaua e mataku ki tēnei mea te hangarau. 'Kāore he take kia mōhio ai i ngā mea katoa,' tana kī. 'Engari, me anga whakamua te kura, tūwherahia te hinengaro ki ngā akoranga rerekē.'
Merita Waitoa-Paki – Tumuaki TKKM o Tuia Te Matangi
Tēna koutou te iwi, ko Merita Waitoa-Paki taku ingoa, ko Hikurangi, ko Puketapu ngā maunga. Ko Te Arai, ko Waiapu ngā awa. Ko Ngāti Porou, ko Rongowhakaata ngā iwi. Ko au te tumuaki o te Kura Kaupapa Māori o Tuia Te Matangi, ki te rohe o te tauihu o te waka a Maui, ki roto o Whakatū. He kura kaupapa tino hou mātou. Kotahi tau noa iho mātou e tū ana ki tēnei o ngā momo wāhi, ā, tēna koutou katoa.
I hou katoa mātou o Tuia te Matangi ki roto i tēnei kaupapa o Te Rangitukutuku. Mai i te wā i tīmata mātou o Tuia te Matangi ko tēra te tauira, ko Te Rangitukutuku. I roto i tēra kua wehewehe i roto i āna whenu, i āna wāhanga, pērā i te kanohi mataara, ērā āhuatanga. Ki a au he tauira pai mō te tautoko ngā kura, i te whānau me pēhea te whakatinana pai, whakatinana tika i te mahi hangarau mōhiohio ki roto i tō kura.
Ko ētahi āhuatanga ka puta mai i te tauira o Te Rangitukutuku, ko te taha o te ārahi, ārahi i tō kura, ārahi i te whānau, ā-Māori nei hoki. Ana, ki tō Te Rangitukutuku kōrero me pēhea koe, te kaiārahi e whakatinana, e ārahi i ngā mahi ako-e i roto i tō kura. Ana, hei āwhina hoki mō te whakarite i tō māhere rautaki, ā, i roto i taua wāhanga o te kanohi mataara he kōrero akiaki i reira mō mātou ngā kaiārahi. Ehara i te mea me mōhio koe ki ngā mea katoa engari, kia kaua koe e mataku. Kei te pai, ahakoa, āe, ko koe te kaiārahi, ehara i te mea me mōhio koe ki ngā mea katoa. Kāore au i te mōhio ki ngā mea o te ako-e, engari kia anga whakamua tā mātou nei kura, me tūwhera taku hinengaro ki ngā akoranga rerekē. Ana, kia kaua ahau e mataku me noho mataara ahau hei kaitiaki mō aku pouako, mō te whānau hoki.
I te mutunga iho, ko koe te kaiārahi, ko koe te tumuaki. Kia kaua koe e waiho tērā haepapa kawenga o te kawe ako-e ki tō kaiwhakahaere hangarau mōhiohio o te kura. Me whakatauira hoki koe, ā, kia eke te kounga o ngā mahi. Arā, me noho tahi koe ki āu pouako ki te whakarite i ngā māhere ako. Me noho tahi koe ki te taha ki tō whānau ki te kohikohi i ngā whakaaro. Mehemea kua mau koe i ō pouako me te whānau ka angitu rawa ngā mahi katoa mō tō kura mō te ako-e.