Te Kete Ipurangi Navigation:

Te Kete Ipurangi
Communities
Schools

Te Kete Ipurangi user options:


Pakirehua

He aha tēnei mea te pakirehua?

He tikanga ako te pakirehua. Me whai taunakitanga kia whai hua ai. Mā te kohikohi taunakitanga e taea ai te whakahāngai atu ki ngā tikanga e tutuki pai ai ngā matea ako o ngā ākonga. Mā te pakirehua ka kīkī haere te kete mātauranga ki ngā tikanga whai hua. Ka mōhio hoki he pēhea te āhua o ā tātou ake tikanga.  

Ko tā te pakirehua he kohikohi raraunga kia mōhio ai ngā taumata e nōhia ana ngā ākonga. Kia mōhio hoki he pēhea ā tātou akoranga e tautoko ai i te ako. Kia wetewetekina te kupu pakirehua ka kitea te tikanga o te kupu.   

  • Paki – he rangi paki
  • Paki – he kōrero; he pūrākau/pakiwaitara
  • Rehu – he āniwaniwa; he kohu
  • Rehu – ka rehua ki te whao
  • Hua – ka whai hua
  • Rehua – he tama nā Rangi rāua ko Papa kei Te Rangitūhāhā e noho ana, e honohono ana ki ngā kete o te wānanga. He whetū anō hoki.

Whakaawetia ai te pakirehua ki ngā āhuatanga katoa o te ao e noho nei tātou, ngā whakapono ā-ahurea, me ngā tikanga. 

Ka whakamārama a Tammy Gardiner rāua ko Marama Reweti-Martin i te pakirehua mai i te tirohanga Māori. Hei tā rāua me whai take te pakirehua hei āwhina i ngā kaiako ki te whakapiki ake i o rātau mahi whakaako. He huarahi te pakirehua e hono ai ngā mahi akoako ki ngā kōrero o te tangata whenua.

Pakirehua me te whakapapa

Nā ngā tīpuna te ara i whakatakoto mō tātou. Ko ngā kōrero, ngā wheako, me ngā mōhiotanga ō rātau he māramatanga ki te ao pakirehua. 

Ko te kōrero mō te orokohanga o te ao, arā, ko te wehenga o Ranginui raūa ko Papatūānuku e ā rāua tamariki, he kōrero hei tūāpapa mō te pakirehua. Mā konei e kitea ai he tangata uiui, he tangata hīraurau hopanga te Māori. Ko tā te pakirehua he whai whanaungatanga. Ko te whakapapa hei taunaki i tēnei tirohanga. He whakapapa kei ngā mea katoa hei kōiwi, ko ngā kōrero, hei kikokiko. 

Ka aro ngā tuhituhinga Māori ki ngā āhuatanga o te pakirehua hei tukanga ki te whakawhanake i te mātauranga Māori. E whakaahua ana i te mōhiotanga hei mōhiotanga hihiri, moroki, aronga hapori hoki.   

Ehara i te mea hou tēnei mea te pakirehua ki te Māori. Mai rā anō a ia e pakirehua ana i ngā mea o tōna ao arā, te titiro atu ki ngā tohutohu o te taiao me te whakaaro ake he aha rā hei huarahi kōkiri whakamua mōku. Ka kōrero a Tammy Gardiner e pā ana ki ōna ake tīpuna me ta rātau mahi pakirehua i ō rātau nā wā.

Te whai huarahi whakapapa
  • Mehemea kei roto te pakirehua i te whakapapa o tētahi whānau, he pēhea tōna āhua?
  • Ki te mōhio koe i ahu mai te aromatawai i te ako, he pēhea te pakirehua?  
  • He aha ngā pānga ki ngā hītori o tō rohe?

Ka whakamāramahia e Tammy Gardiner rāua ko Marama Reweti-Martin ko tā te Māori titiro ki te pakirehua. Nā rāua anō i tautoko ētahi kaiako ki te whakarite pakirehua, te whakatau he aha ngā taumata ka eke, me te kawe ake i tēnei kaupapa kia tīna.

Pakirehua me Te Marautanga o Aotearoa

I roto i Te Marautanga o Aotearoa ka whakatakotohia tētahi huarahi pakirehua hei whaitanga ake mō ngā kaiako kei ngā kura me ngā akomanga rumaki reo Māori, e kīia nei ko Te Hurihanga Whakaako Pakirehua me te Waihanga Mātauranga

Ko te hoahoa o raro i ahu mai i te huarahi pakirehua ako o te New Zealand Curriculum hei huarahi mō ngā kaiako o te reo Māori. Hei pātai mā ngā kaiako:  

  • He aha te āhuatanga o te hōtaka ako o te akomanga hei whakapiki ake i ngā hua ako o ngā ākonga?
  • Me pēhea au e whakaako ai? Kia whai wāhi ki ngā huarahi, ki ngā hangarau matihiko hei tautoko i te ako. 
  • He aha au i whakatau pēnei ai? 

 

Pakirehua – Teaching as inquiry cycle

Ngā hua o te pakirehua 

Nā te kohikohi raraunga, te whakatakoto whāinga, te whakarato i ngā whakatutukitanga ki ngā mātua i kite ai i ngā hua mō ngā kaiako, ngā ākonga, me ngā whānau. Whakatenatenahia ngā mātua, ngā whānau hoki kia whai rautaki ki te kāinga hei tautoko i ā rātou tamariki ki te tutuki ngā whāinga ako i te kura.    

Ka kitea, ka whakamahia hoki e ngā kura e kaha ana ki te whakamahi i ngā huarahi pakirehua, ngā akoranga whai tikanga hei whakapiki i te tutukitanga o ngā ākonga. Nā konei i kite ai ngā hua pai i roto i tētahi wā poto.   

"Ki te mōhio ngā ākonga kua whai wāhi ngā kaiako ki te mōhio ko wai rātou, ngā hītori me ngā ahurea o rātou, nō hea rātou, ō rātou whakapono, uara anō hoki, ka mōhio rātou e arohaina rātou e te kaiako. Kātahi ka whai pānga te kaiako me te tamaiti, mā reira ka ako te tamaiti ahakoa ko wai."       

Tammy Gardiner

Ngā rauemi

Hui ā-ipurangi: Pakirehua - Te ako hei pakirehua ki tā te Māori titiro

Ka whakamārama a Tammy Gardiner rāua ko Marama Reweti-Martin i te pakirehua, ka pēhea hoki ngā kaiako me ngā tumuaki e mahi ana i ngā huarahi hei whakapiki i te whakatutukitanga o ngā ākonga.  

Pakirehua: He pakirehua ā-kaiako ki tā te Māori titiro  

Hono atu ki tēnei hui mā te VLN.

e-Learning community discussions

Keep informed

Subscribe to the newsletter.


Footer: